എഴുത്താണി✒️

  സ്നേഹത്തിൽ തോറ്റ് പോയവരെ ഓർത്തെടുക്കാം ഭൂമിയിൽ മനുഷ്യരേറ്റവും ഭയപ്പെടുന്നത് എന്താവും എന്ന് എപ്പോഴെങ്കിലും ചിന്തിച്ചിട്ടുണ്ടോ ? മനുഷ്യനെ ഇഞ്ചിഞ്ചായി കൊന്നുകളയുവാൻ ഇതിലും ലളിതമായൊരു ഉപാധിയുണ്ടോ എന്ന് തന്നെ സംശയമാണ്. പ്രിയപ്പെട്ടവരുടെ അവഗണന സ്നേഹത്തിൽ അഭയം തേടിയ നമ്മൾ സ്നേഹത്തിന് വേണ്ടിയുള്ള അഭയാർത്ഥിയായി മാറുന്നത് എത്ര പെട്ടന്നാണ് ; വിഷാദം നിറഞ്ഞ വീഞ്ഞ് കോപ്പ പോലെ. പ്രിയപ്പെട്ടവരുടെ ഹൃദയങ്ങളിൽ മടുപ്പിന്റെ ഭ്രൂണം വളരുകയും സ്നേഹത്തിന്റെ ഇലച്ചാർത്തുകൾ പട്ട്പോവുകയും ചെയ്യുമ്പോൾ, ഉൾക്കാഴ്ചകളിൽ നിന്ന് പോലും നമ്മൾ മായ്ഞ്ഞു പോകുന്നു. സ്നേഹത്തിൽ അവനവനായി ആവിഷ്കരിക്കാൻ കഴിയാതെ വരുന്നത് കൊണ്ടോ, നമ്മളിലേക്ക് തിരികെ വരാനുള്ള വേരുകൾ അടർന്നു പോകുന്നത് കൊണ്ടോ, അതുമല്ലെങ്കിൽ നമ്മുടെ സ്നേഹത്തിൽ തുടരാനുള്ള കാരണങ്ങൾ ഇനിയുമില്ലെന്ന ചിന്തയാകണം, പലരും തുന്നിപ്പിടിപ്പിച്ച ചമയങ്ങളഴിച്ചു മാറ്റി ഒന്നുമേ മൊഴിയാതെ നമ്മിൽ നിന്നിറങ്ങി ഒരുപോക്ക് പോകുന്നത്. പലരും കാത്തിരിക്കുന്നുണ്ടാവും സ്നേഹത്തോടെയുള്ള പിൻവിളികൾക്കായി. ഇടയ്ക്കിടെ ഞെട്ടലോടെ തിരിഞ്ഞു നോക്കുന്നുണ്ടാവും ആ സ്നേഹം തോളിൽ വന്ന് കയ്യിടുന്നുണ്...