background

മുറിവുകൾ🖤

" ദൈവം എല്ലാം കാണുന്നയാളാ... നീ ഇന്നൊരാൾക്ക് വേദനകൊടുത്താൽ കാലം നിനക്കത് തിരിച്ചെത്തിക്കാതെയിരിക്കില്ല. അതുപോലെ തന്നെ അദ്ദേഹം നിനക്കൊരു വേദന തന്നാൽ അതിന്റെ പ്രതിഫലം കാലം പിന്നീട് അയാൾക്ക് കൊടുക്കും ". 

ഈ വാചകങ്ങൾ മനസ്സിരുത്തിയൊന്ന് ആലോചിച്ചാൽ നമ്മൊളൊക്കെ എത്രയോപേരെ വേദനിപ്പിച്ചു എന്ന് മനസിലാക്കാം ; അതുപോലെ നമ്മളെ വേദനിപ്പിച്ചവരേയും.

നാലാള് കൂടുന്നിടത്ത്‌വെച്ച് നമ്മളൊക്കെ ചില സുഹൃത്തുക്കളെയൊക്കെ കളിയാക്കാറുണ്ട് അവിടെയൊക്കെ ചെറുതായി നിന്ന്, തോറ്റ് തരാറുമുണ്ട്. 

നിഷ്കളങ്കമായ മനസ്സിനുടമകളായിരുന്നു അവരൊക്കെ. അതിലുപരി ബന്ധങ്ങൾക്ക് വിലകല്പിച്ചിരുന്നു. 

അങ്ങനെയൊക്കെ ചില സുഹൃത്തുക്കൾ കൂടെയുള്ളതാണ് സ്നേഹം എന്നതിനെ കൂടുതൽ അറിയാൻ സഹായിക്കുന്നത് ; അവിടെയാണ് സ്നേഹം സ്നേഹിക്കപ്പെടുന്നത്. 

നമുക്കൊക്കെ തെറ്റുകളുണ്ടാകുന്നത് മാനുഷികമാണ്. ആ തെറ്റുകൾ ക്ഷമിക്കുന്നതാണ് ദൈവികം. 

ക്ഷമിക്കുക എന്ന് പറയുന്നത് അത്ര നിസ്സാരമല്ല. 

നമ്മുടെ പ്രിയപ്പെട്ടവരോടൊക്കെ ദേഷ്യം കൊണ്ട് വാക്കുകളിലൂടെ മുറിവേൽപ്പിക്കാറുണ്ട്. പിന്നീട് നമ്മള് പോയി സോറി പറയുമായിരിക്കും. പക്ഷേ അവരുടെ ഹൃദയത്തിലേക്ക് ആഴത്തിൽ പതിച്ച ആ വാക്കുകൾ അവർ മറക്കണമെന്നില്ല. അവർ ഒരിക്കൽപ്പോലും നമ്മളിൽ നിന്ന് അങ്ങനെ പ്രതീക്ഷിച്ചിട്ടുണ്ടാകില്ല. 

കോപം ഉള്ളിൽ പതഞ്ഞു പൊങ്ങുമ്പോൾ അതിന്റെ പ്രത്യാഘാതങ്ങളെക്കുറിച്ച് ചിന്തിക്കുക  (വോൾട്ടയർ )

എല്ലാവരും പരസ്പരമൊന്ന് മനസ്സിലാക്കിയാൽ തീരാവുന്ന പ്രശ്‌നമേ നമുക്ക് ചുറ്റ്മുള്ളൂ. 

വൈകിയ വേളയിലായിരിക്കും നമ്മളൊക്കെ ചിന്തിച്ചിട്ടുണ്ടാവുക അവനോട് അല്ലെങ്കിൽ അവളോട്‌ കുറച്ച് കൂടി നന്നായി പെരുമാറാമായിരുന്നു. ഈ കുറ്റബോധമുണ്ടല്ലോ അത് ഹൃദയത്തിൽ വലിയൊരു മുറിവ് തന്നെ സൃഷ്ടിച്ചേക്കാം. 

തെറ്റിനെ പൊറുക്കുക ; മുറിവുകളെ ഹൃദയം കൊണ്ട് ചുംബിക്കുക. കാലം മായ്ക്കാത്ത മുറിവുകളില്ലല്ലോ...